خیال محمد کټوازی

شعر

ځوانه که پښتو وایې نو ښه پښتو به وایی

دغه دجنت له خواتوښه پښتوبه وایې

ته د درنوغرونوپه لمنوکې لوی شوی یې

سپکه خوبڼکه ده،درنه پښتو به وایې

ښه یې له پردیوزیږوتوروڅخه وچڼه

ستا ژبه سپېڅلې ده سوچه پښتو به وایې

داد ګلو ونه چې وطن پرې ښکلی شوی دی

څانګې ورنه مه شکوه نګه پښتو به وایې

اوس یې چې ګرېوان ته تورلاسونه ورلوېدلې دې

ښه په لمن پاکه پښتنه پښتو به وایې

ژبه خوپسول ده د ولس دښکلا ناوې ته

ګل غوندې سمباله په ګاڼه پښتو به وایې

ځنې غمازان یې د اوګرې غوندې لړی سره

ستا څخه مې هیله ده خوږه پښتو به وایې

بیایې دنړۍ له سترو ژبو سره سیاله کړه

ځانته که افغان وایې کره پښتو به وایې

ښکلې امېلونه دشعرونو ور په غاړه کړه

«خیاله» ښه مهینه ښایسته پښتو به وایې